1 Corinthians 3

1

ARI ri ai kan i sota kak padaki on komail dueta on aramas wenin, a on me uduken o kisin seri en Kristus akan.

2

I kamana kin komail pil en didi, a kaidin kisin mana, pwe komail saikenta kak on, o komail pil sota kak on ansau wet.

3

Pwe komail non uduken pwe iaduen, ma peirin o akamai, mi re omail, komail so uduken o weweid ni tiak en aramas akan?

4

Pwe amen kin inda: Nai nain Paulus amen, a amen: Nai nain Apolos amen. Komail so kin mi nin tiak en aramas?

5

Pwe is Apolos? O is Paulus, kaidin papa kai, me komail asa saner lamalam duen Kaun o kotin pan on amen amen?

6

Nai me padukedier, a Apolos me kalamu ir adar, a Kot me kotin kaparadar. wiaw.

7

Ari kaidin i meakot, me padukedi, pil kaidin i, me kalamu ir adar, a Kot eta, me kotikidar wa kan.

8

Ari, me kin padukedi o me kin kalamu ir adar, ira dupeneta, o amen pan katinki iran ara dodok.

9

Pwe kit me sauas pan dodok en Kot, a komail sapasap en Kot, o sapwilim en Kot a kakau im.

10

Nai me wiadar pason ki mak en Kot me i aleer duen sause lolekon amen, a amen usewei kakau poa, a amen amen en kalaka duen a kakau pon pason wet!

11

Pwe sota me pan kak wia eu pason, me pan toror san me wiauier, i eta: Iesus Kristus.

12

Ari, ma amen pan kauada pon pason wet kold, silper, takai, kasampwal, tuka, ra, pain kit akan,

13

Nan wiawia en amen amen pan sansaleda, pwe ran o pan kapareda due, pwe a pan kadiarok kida kisiniai. Pwe kisiniai pan kaialeda wiawia en amen amen.

14

Ma wiawia en amen, me a kauadar poa, pan mimieta, a pan katin.

15

A ma wiawia en amen pan ronala, a sota pan katin. A pein i pan dorela duen amen, me pitila san nan kisiniai.

16

Komail sota asa, me komail tanpas en Kot, o Nen en Kot kotikot lol omail?

17

A ma amen kawela tanpas en Kot, nan Kot pan kawela i, pwe tanpas en Kot me saraui, ari iei komail.

18

Sota amen en kotaue pein i! Ma amen nan pun omail lamelame ansau wet, me a lolekon, mak eta, en wiala ol pweipwei men, pwen wiala lolekon amen.

19

Pwe lolekon en sappa et me son en pweipwei ren Kot, pwe a intinidier: A kin kaloe kidi me aklolekon pein ar widiwidin.

20

Pil eu! Kaun o kotin mani, lamalam en me aklolekon kan, me mal.

21

Ari, sota amen en akkeleki aramas akan, pwe omail meakaros;

22

Ma Paulus, de Apolos, de Kepas, de sappa, de memaur, de mela, de ma men met, de men mur, pwe karos me omail.

23

A komail sapwilim en Kristus, a Kristus sapwilim en Kot.